உலகமயமாகும் தமிழர் வளர்ச்சி

உலகமயமாகும் தமிழர் வளர்ச்சி

மறவன்புலவு க. சச்சிதானந்தன் (ஐக்கிய நாடுகளின் மேனாள் ஆலோசகர்)

தென்துருவத்தில் தமிழ்ப் பெயரில் ஒரு பனிப்பாறை வட்டம். சில ஆண்டுகளுக்கு முன் அந்தப் பெயரைச் சூட்ட உலகம் முன்வந்தது. இன்று உலகம் முழுவதும் அனந்தகிருட்டிணன் பனிப்பாறை புகழ்பெற்றுவிட்டது. தமிழரான அனந்தகிருட்டிணனின் அறிவியல் புலமையை, புவியியல்சார் புலமையைப் பாராட்டி, வாழும் காலத்திலேயே அவர் பெயரை இடப்பெயராக்கியது உலகம். அவ்வாறு பெயர் சூட்டமுன் தென்துருவ அண்டாட்டிக்கா பெயரிடுவதற்கான உலக அமைப்பிடம் ஒப்புதல் பெற்றனர்.  

வானத்தில் புதிதாகக் காணும் விண்மீனுக்குப் பெயரை அவரவர் நினைத்தவாறு சூட்டமுடியாது. 1919 முதலாக இயங்கிவரும் International Astronomical Union (IAU) எடுக்கும் தீர்மானமே இறுதியானது. முதலில் எண் பெயராகும். பின்னர் பொருத்தமான பெயரை விவாதிக்க ஆறு மாதங்களாகும். அனைத்து நாட்டவரும் ஏற்றபின்னரே பெயரிடப்படும்.

வங்காள விரிகுடாவிலும் அரபிக் கடலிலும் தோன்றும் புயல்களுக்குப் பெயரிடத் தெற்காசிய அமைப்பின் வானிலையாளர் குழு உண்டு. அப்பெயரே உலகம் ஏற்ற பெயராகும்.

கலைச் சொற்கள், எழுத்துச் சீர்மை, எழுத்துக்கூட்டல் சீர்மை, ஒருங்குறிச் சீர்மை, ஒலிபெயர்ப்புச் சீர்மை, எழுத்துப் பெயர்ப்புச் சீர்மை, தமிழர் நாட்காட்டி, இடப் பெயர்ச் சீர்மை எனக் கடந்த 60-70 ஆண்டுகளில் எழுந்த வளர்ச்சி நோக்கிய ஒவ்வொரு சிக்கலும் தமிழ் மொழிக்கும் தமிழருக்கும் வந்த சிக்கல்கள் அல்ல.

உலகில் வளர்ச்சி நோக்கிய மொழியாளரும் இனக்குழுக்களும் எதிர்கொள்ளும் சிக்கல்களே. அவற்றைத் தீர்க்க உலகில் பல்வேறு சூழல்களில் மேற்கொண்ட முயற்சிகள் தமிழருக்கு வழிகாட்டி.

·                     இதய நோய்க் கலைச் சொற்களா? The International Working Group for Mapping and Coding of Nomenclatures for Pediatric and Congenital Heart Disease,

·                     உயிரிவேதியியல் பெயர்களா? Nomenclature Committee of the International Union of Biochemistry and Molecular Biology.

·                     உலளாவிய இடப்பெயர்களா? UN Group of Experts on Geographical Names (UNGEGN)

·                     தாவரவியல் பெயர்களா? International Code of Botanical Nomenclature,

·                     விலங்கியல் பெயர்களா? International Commission on Zoological Nomenclature,

·                     வேதியியல் பெயர்களா? IUPAC nomenclature of Chemistry.

இவ்வாறாகத் துறைதொறும் துறைதொறும் வளர்ச்சியை நோக்கிய சீர்மை, கட்டிறுக்கமாக அமைந்து வருதைலையும் உலகமயமாகும் தமிழர் நிலையையும் நோக்கவேண்டும்.

சீன மொழியில் பெயரிடத் துறைதொறும் அனைத்துலக அமைப்புகள் உள. ஒப்பனைப் பொருட் பெயருக்குரிய அமைப்பு: Chinese Nomenclature of International Cosmetic Ingredients.

சீன மொழி உச்சரிப்புச் சீர்மைக்காக 1912-1913இல் அமைந்த ஆணையம், தொடர்ந்து நவம்பர் 23, 1918இல் சீன அரசின் ஆணையாகச் சுயின் புகாவோ என்று இன்று வரை வழக்கில் உள்ள சீர்மையான மண்டரின் சார் ஒலி அமைப்புத் தரமே உலகத் தரம்.

எழுத்துப் பெயர்ப்பு மற்றும் ஒலிபெயர்ப்புக்காகப் உலகத் தரங்கள் அமைந்துள்ளன.

·                     அரபி வரிவடிவ - உரோம வரிவடிவத் தரமாக ISO 233:1984, ISO 233-2:1993,

·                     அரபி வரிவடிவ, பாரசீக வரிவடில - உரோம வரிவடிவத் தரமாக ISO 233-3:1999,

·                     ஆர்மினியன் வரிவடிவ - உரோம வரிவடிவத் தரமாக ISO 9985:1996,

·                     இந்தியிலிருந்து உரோம வரிவடிவத் தரம் 1972இல் திரு. சர்மா விதந்துரைத்ததை ஐநா ஏற்றது,

·                     ஈபுறு வரிவடிவ - உரோம வரிவடிவத் தரமாக ISO 259:1984, ISO 259-2:1994,

·                     உருசிய சிரிலிக் வரிவடிவ – இலத்தீன் சார் வரிவடிவத் தரமாக ஐஎசோ9 (ISO 9),

·                     கிரேக்க வரிவடிவ – உரோம வரிவடிவத் தரமாக ISO 843:1997,

·                     கொரிய வரிவடிவ - உரோம வரிவடிவத் தரமாக ISO/TR 11941:1996

·                     சோர்சிய வரிவடிவ - உரோம வரிவடிவத் தரமாக ISO 9984:1996,

·                     தாய்லாந்து வரிவடிவ - உரோம வரிவடிவத் தரமாக  ISO 11940:1998, ISO 11940-2:2006,

·                     தேவநாகரி வரிவடிவ - உரோம வரிவடிவத் தரமாக ISO 15919:2001

·                     மண்டரின் – உரோம வரிவடிவ உலகத் தரமாகப1982 முதலாகப் பின்யின் ISO 7098:1991,

·                     யப்பானிய வரிவடிவங்களை உரோம வரிவடிவங்களாக்க ISO 3602,

மொழிவழி நாடுகளின் கூட்டமைப்புகள் அனைத்துலக அமைப்புகளுக்கு வழிகாட்டியாக, ஐநா ஆதரவு பெற்றவையாக உலகமயமாகிய மொழிகளின் சீர்மைக்கு உதவுகின்றன.

·         பிரஞ்சு மொழி வழங்கும் 44 நாடுகள், Organisation internationale de la Francophonie

·         அரேபிய மொழி வழங்கும் 22 நாடுகள் Arab League,

·         இசுப்பானிய மொழி வழங்கும் 20 நாடுகள் Asociación de Academias de la Lengua Española,

·         போர்த்துக்கேய மொழி வழங்கும் 11 நாடுகள் Comunidade dos Países de Língua Portuguesa,

·         சுவாகிலி மொழி வழங்கும் 5 நாடுகள் East African Community

எனவும் பிறவுமாக, தத்தம் மொழி, பண்பாடு, அடையாளம் பேணல் தொடர்பாக அரசுக் கூட்டமைப்புகளை வைத்திருப்பதும் யுனெஸ்கோ அவற்றுக்கு நிதி மற்றும் அமைப்பு ஆதரவு வழங்கி ஒருங்கிணைப்பதும் உலகமயமாகும் தமிழருக்கு முன்னோட்டங்கள்.

தமிழ்ப் புத்தாண்டு தமிழர் திருநாள். எனவே ஏப்பிரல் 14 விடுமுறை நாள். 1970களில் நகராட்சி தீர்மானம் இயற்றுகிறது. நகராட்சித் தலைவர் மருத்துவர் அச்சேல் கிருட்டிணன். தீர்மானம் இயற்றிய சில நாள்களுள் அவர் சிறையில்.

தமிழர் திருநாளுக்கு விடுமுறை. எனவே தமிழரான நகராட்சித் தலைவர் சிறையில். நகரம் சான்தெனிசு. நிலப்பகுதி இறியூனியன். பிரஞ்சு நாட்டின் கடல்கடந்த மாகாணம்.

சிங்கப்பூர், சிலோன் சாலை, செண்பக விநாயகர் கோயில், அமைச்சர் பங்கேற்கும் நிகழ்ச்சி, தமிழ்ப் புத்தாண்டு. மருத்துநீர், கைவிசேடம், போர்த் தேங்காய் எனப் பரம்பரை வழக்கங்களின் வெளிப்பாடு. சீன, மலாய், பரங்கி நண்பர்கள் சூழ்ந்திருக்கச் சிங்கப்பூரில்  விழா. சித்திரை முதல் நாள் தமிழ்ப் புத்தாண்டு விழா. நூறாண்டு கால வழமை.

மலேசியாவில், மியன்மாரில், மொரிசியசில், தென் ஆபிரிக்காவில் கரிபியன் நிலப்பகுதியில் பிசித் தீவில், நூறாண்டுகளாகத் தமிழ்ப் புத்தாண்டு சித்திரை முதல் நாளே.

சீனக் குழந்தைகளைத் தத்தெடுத்துத் தமிழர் வளர்க்க, அவை தமிழ்க் குடும்பங்களாக வளர, மலேசியாவிலும் சிங்கப்பூரிலும் உள்ள கணிசமான சீனக் குடும்பங்களும் சித்திரைத் திருநாளே தமிழ்ப் புத்தாண்டு நாள் என்ற அடையாள உணர்வுடன், தம் அயலில் உள்ள சீன மரபினரின் சீனப் புத்தாண்டைப் புறந்தள்ளிக் கொண்டாடுவர்.

இவர்கள் யாவரும் எங்கிருந்தாலும் தமிழர். தமிழ் அடையாளங்களைக் கைவிடாத தமிழர்.

சீனர், மலாய்க்காரர், சிங்களவர், பர்மியர், ஆபிரிக்கர், அமெரிக்கர், ஐரோப்பியர், பிசியர், அரேபியர் யாவருக்கும் தம் அயலில் தம்மோடு வாழும் தமிழரின் புத்தாண்டு நாள் சித்திரை முதல் நாளே.

1921இல் மறைமலை அடிகள் தலைமையேற்ற குழு, தமிழகத்தில் மட்டுமே தமிழர் வாழ்வதாகக் கொள்ளவில்லை. தமிழரின் புத்தாண்டு எந்த நாள் எனத் தீர்மானிக்கையில் தமிழர் ஒவ்வொருவரையும் நோக்கியே தீர்மானித்தனர். தமிழராகத் தம்மைக் கருதுவோர் ஒவ்வொருவரையும் நோக்கியே தீர்மானித்தனர்.

30 வினாடி ஒரு நாழிகை, 60 நாழிகை ஒரு நாள் எனத்தொடங்குவதும், வினாடி, நிமிடம், மணி, நாள் எனத் தொடங்குவதும், வாரம், மாதம், ஆண்டு என்ற அளவுகளும் காலக் கணக்குகள். அக்காலக் கணக்குக்குத் துணையாக, சூரியன், சந்திரன், விண்மீன்கள்.

சூரியனைப் பூமி சுற்றிவர ஆகும் (365.242199 நாள்கள்) 365 (4ஆண்டுகளுக்கு ஒருமுறை  356) நாள்கள் என்பதோ, பன்னிரண்டு மாதங்கள் என்பதையோ, நிலவு பூமியைச் சுற்றிவர 29.5 நாள்கள் (29 நாள் 12 மணி 44 நிமிடம்) என்பதையோ, பூமி சூரியனைச் சுற்றி வருகையில் காணக்கூடிய 27 விண்மீன் கூட்டங்கள், அவற்றைப் 12 இடங்களாக்கிக் காண்பதையோ 1921ஆம் ஆண்டுப் புலமையாளர் கூட்டத்தினர் கருத்தில் கொண்டார்களா தெரியவில்லை. அந்தக் கூட்டத் தீர்மானமோ, பங்குபற்றியோர் வல்லமை மற்றும் புலமை அளவுகளோ, அக்கூட்டக் குறிப்போ, செய்தி வெளிவந்த இதழ்களோ கிடைக்குமாயின் விவரங்கள் தெரியவரும்.

தமிழருக்கென நாட்காட்டியை 1921ஆம் ஆண்டுப் புலமையாளர் கூட்டத்தினர் தயாரித்ததாகச் செய்திகள் வெளிவரவில்லை. புத்தாண்டு நாளை மட்டும் குறிப்பிட்ட அக்குழுவினர், ஏனைய விவரங்களைத் தொகுத்து முழுமையான காலக் கணக்குடன் அமைந்த தமிழ் நாட்காட்டியை அமைக்க வல்லுநர் குழுவை அமைத்தர்களா தெரியவில்லை.

சிங்களத் தேசிய எழுச்சி, தொடர்ந்த தமிழருக்கெதிரான இனவொழிப்புக் கொள்கை, இதனால் 1983 முதலாக உலகின் 30 நாடுகளில் தஞ்சம் புகுந்ததோடன்றி, அங்குள்ள அரசுகளிடம் மானியம் பெற்றுத் தமிழ் அடையாளங்களப் பேணிவருகின்ற அண்மைக்காலப் புலம்பெயர் தமிழர்களும் தமிழ் வழக்குகளை உலகமயமாக்கி உள்ளனர்.

உலகின் 29 அரசுகள் (அமெரிக்க ஐக்கிய மாநிலங்கள், அயர்லாந்து, ஆஸ்திரேலியா, இத்தாலி, இந்தியா, இந்தோனீசியா, இலங்கை, கனடா, கிரேக்கம், சிங்கப்பூர், சீசெல்சு, சுரினாம், சுவாசிலாந்து, சுவிற்சர்லாந்து, சுவீடன், தென்னாபிரிக்கா, தென்மார்க்கு, நியுசிலாந்து, நெதர்லாந்து, நோர்வே, பிரான்சு, பிரிட்டன், பிசி, பெல்சியம், மலேசியா, மியான்மார், மொறிசியசு, யேர்மனி, வத்திக்கான்.) தமிழ் மொழி வளர்ச்சிக்கும் தமிழ்ப் பண்பாட்டுப் பேணலுக்கும் தத்தம் மக்கள் வரிப்பணத்திலிருந்து நிதி ஒதுக்குகின்றன.

250 ஆண்டுகளுக்கு முன்னர் மொரிசியசின் உலூயித் துறைமுகத்தில் தமிழர் சென்றிறங்கியதை மொரிசியசு அரசே விழாவாக்கியது.

நியுசிலாந்து, சிங்கப்பூர், மொரிசியசு, இந்தியா ஆகிய நான்கு நாடுகளில் குடியரசுத் தலைவர்களாகத் தமிழர் பதவி வகித்துள்ளனர். இலங்கையின் இடைக்கால ஆளுநராகத் தமிழர் ஒருவர் இருந்துள்ளார். கரிபியனில் சமைக்காவின் அண்மைய பிரதமராகத் தமிழ் மரபிரான பெண்மணி தேர்வாகி உள்ளார்.

இந்தியா, இலங்கை, சிங்கப்பூர், மலேசியா, மொரிசியசு, தென் ஆபிரிக்கா ஆகிய நாடுகளின் அமைச்சரவைகளில் தொடர்ச்சியாகத் தமிழர் உறுப்பினராகியுளர். இந்தியாவின் இரு மாநிலங்களிலும், இலங்கையின் ஒரு மாகாணத்திலும் தமிழரே முதலமைச்சர் இவ்விரு நாடுகளிலும் மாநிலங்கள் பலவற்றின் ஆளுநர்களாகத் தமிழர்கள்.

2008 தொடக்கம் ஐக்கிய நாடுகள் அவையின் மனித உரிமைகள் ஆணையத் தலைவர் தமிழர்.

பல நாடுகளின் உள்ளூராட்சி அமைப்புகளில் தமிழர் உறுப்பினராக, தலைவர்களாக உள்ளனர்.

2011இல், 24 வயதான செல்வி இராதிகா சிற்சபையீசன் கனடா நாடாளுமன்றத்தில் தமிழில் பேசிய உறுப்பினர்.

இவ்வாறு கடந்த 250 ஆண்டுகளாகப் படிப்படியாக உலகமயமாகி வருகின்றது தமிழ்ப் பண்பாட்டுச் சூழல்.

இந்தச் சூழலில் 1921ஆம் ஆண்டுத் தீர்மனத்தையும் தமிழக அரசின் எதிரும் புதிருமான இரு தீர்மானங்களையும் நோக்குவோர், தமிழகத்தை மாறி மாறி ஆட்சி செய்வோரின் பரமபத விளையாட்டுக் கண்ணோட்டத்தை நோக்குவார்களாக.

தமிழக அரசே உலகத் தமிழர்களின் தாய் அரசு எனக் கருதுமாறும், தத்தம் மக்கள் வரிப்பணத்தில் தம்முடன் வாழும் தமிழரின் அடையாளங்களைப் பேண மானியம் வழங்கும் 29 அரசுகளின் வழிகாட்டி அரசு என்றும் கொள்ளலாமா?

புத்தாண்டு தொடர்பான தமிழக அரசு ஆணைகளோ தமிழகச் சட்டசபைத் தீர்மானங்களோ, புதுச்சேரி ஆட்சிப் பகுதித் தமிழரைக்கூடக் கணக்கில் எடுத்துக்கொள்ளவில்லையே. அவர்களும் தமிழ் நிலத்தவரலாலவா?

தமிழ் இணைய முதலாவது மாநாட்டில், உலகத் தமிழரை அழைத்து, தமிழ்99 விசைப்பலகையைத் உலகத் தரமாக்கியமை எடுத்துக்காட்டு. 

தமிழ் மொழி, தமிழ்ப் பண்பாடு, தமிழர் அடையாளம் பேணல் என்பன தொடர்பான தீர்மானங்களைத் தமிழக அரசு தனித்து மேற்கொள்ளலாகாது. உலகளாவிய பிற மொழியாளர்கள், பண்பாட்டாளர்கள் எடுத்துக் காட்டியது போல, உலகத் தமிழரின் பண்பாட்டுக் கொள்கைகளை உலகத் தமிழர் இணைந்தே வகுக்க வழிசெய்வோமாக.